“මානෙල් මම රුවිනිගේ හස්බන්ඩ් සුනිල් කතා කරන්නේ. ඔයාගේ හස්බන්ඩ් කරන හොර වැඩක් අල්ලලා දෙන්නයි මම කතා කළේ. කමල් වෙන ගෑනියෙක් එක්ක යාළුවෙලා ඉන්නවා කියලා ඔයා දන්නවද?”
සුනිල් තම ජංගම දුරකථනයෙන් මානෙල් අමතමින් කීවේය. මානෙල් සුනිල්ගේ බිරිඳගේ සමීපතම යෙහෙළියකි.
“ඔයා කියනකම් මට එහෙම දෙයක් ආරංචි වෙලාවත් නැහැ අයියේ. මට නං විශ්වාස කරන්නත් අමාරුයි.”
“හරි මම වැඩේ ඔයාගේ අතටම අල්ලලා දෙන්නම්. හැබැයි ඔයා මේ බව දන්න වගක් පෙන්නන්න එපා. අපේ රුවිනිටවත් මේක කියන්න එපා.”
දින කිහිපයකට පසුව සුනිල් යළි මානෙල්ට දුරකථන ඇමැතුමක් දුන්නේය.
“මානෙල් ඔන්න අද ඔයාගේ අතටම වැඩේ අල්ල ගන්න පුළුවන්. කමල් අර ගෑනිත් එක්ක දැන් අළුත්ගම හෝටලයක රූම් එකක් ඉන්නවා.”
සුනිල් ගේ කතාව සමඟම මානෙල්ට ඉවසුම් නැතිව ගියාය. සැමියාට මෙපමණ ආදරයෙන් සිටිද්දී ඔහු වෙනත් ගැහැනියක් සමඟ සිටිනවා යැයි ඇසීමද ඇයට දුකක් මෙන්ම තරහක් ද ආවාය.
“සුනිල් අයියේ ඔය හෝටලය තියෙන්නේ කොහේද? මානෙල් ඇසුවාය.
“ඔයාට තනියෙන් හෝටලයට යන්න බැහැ. කවුරුහරි දැක්කොත් හොඳ නැහැනේ. මම ඔයාව හෝටලයට එක්ක යන්නම්. ඔයා
අළුත්ගම ඩිපෝව ළඟට එන්න.”
සුනිල් මානෙල්ගේ හොඳම මිතුරිය ගේ සැමියාවීමත් කලක පටන් ඔහු දන්න නිසාත් මානෙල්ට සුනිල් පිළිබඳ සැකයක් ඇති වූයේ නැත.
ඇයට උවමනාව වී තිබුණේ තම සැමියා වූ කමල් ව ඔහුගේ අනියම් බිරියත් සමඟ අතටම අල්ලා ගැනීමය.
විනාඩියට දෙකට සූදානම් වූ මානෙල් ඩිපෝව සමීපයට පැමිණ සුනිල් ව හමුවුණාය.
“මම බයිසිකලෙන් ඉස්සරවෙලා යන්නම්. ඔයා පිටිපස්සෙන් එන්න.”
යතුරු පැදිය හෝටලය ඉදිරිපිට නතර කළ සුනිල් මානෙල් එතැනට එනතුරු බලාගෙන සිටියේය.
“අන්න අර කාමරේ තමයි දෙන්නා ඉන්නේ සුනිල් අත දිගහැර හෝටලයේ කාමරයක් මානෙල්ට පෙන්නුවේය.
“එහෙනම් අපි මෙතන හැංගිලා ඉඳීමු.”
මානෙල් එසේ කීවද සුනිල් එයට හරස් විය.
“මෙතන ඉන්න බැහැ. අනික මෙතන පැය කීයක් ඉන්න වෙයිද කියලා කවුද දන්නේ. කවුරුහරි අපි දෙන්නව දැක්කොත් තවත් මොනවාහරි හිතාවි. කමල් ඉන්න කාමරයට එහා කාමරයෙ අපි ඉඳීමු. කොයිවෙලාවේ හරි කමල් එළියට එයිනේ. නැත්නම් අපි මෙතැන ඉන්නව දැක්කොත් එයාලා මාරුවෙයි.”
සුනිල් පිළිබඳ සැක සිතන්නට ඇයට උවමනාවක් නැත. ඒ ඇය සුනිල් ගැන හෙඳීන් දන්නා නිසාය. ඇය සුනිල්ගේ ඉල්ලීමට එකඟ වූවාය.
කාමර ගාස්තුව ගෙවා දැමූ සුනිල් මානෙල් සමඟ කාමරය ඇතුළට ගියේය. මානෙල් එහි තිබූ ඇඳ මත වාඩි වූවාය.
සුනිල් කාමරයේ දොර වසන්නට සූදානම්
විය.
“ඇයි දොර වහන්නේ?”
“කමල් මේකට එබිල බලයිද දන්නේ නැහැ. එහෙම වුණොත් ඔයාට හොඳ නැහැනේ” ටික වේලාවක් කාමරයේ පුටුවකට බරවී නොයෙකුත් දේ කියමින් සිටි සුනිල් එකවරම සිය ජංගම දුරකථනයේ කැමරාවෙන් කාමරයේ ඇඳ උඩ සිටින මානෙල්ගේ ඡායාරූප කිහිපයක් ගත්තේය.
“මොකටද සුනිල් අයියේ ෆොටෝ ගන්නේ”
“ඔයාට මේවා කමල්ට පෙන්නලා කියන්න පුළුවන්නේ මමත් මෙහා පැත්තේ කාමරයේ හිටියා කියලා” මානෙල් ගේ ප්රශ්නෙට සුනිල් දුන්නේ එවන් උත්තරයකි.
“ඔයා කාමරය ඇතුළට වෙලා ඉන්න මම එළියට ගිහින් කමල් ව බලල එන්නම්”
එසේ කියූ සුනිල් කාමරයෙන් එළියට ගියේය.
විනාඩි පහකින් පමණ සුනිල් යළි කාමරයට ආවේය.
“මාර වැඩේනේ වෙලා තියෙන්නේ මේ දැන් කමලුයි ඒ ගෑනියි හෝටලයෙන් ගිහින්.”
සුනිල් එසේ කියද්දී මානෙල්ගේ බලාපොරොත්තු සියල්ල සුන්වී ගියාය.
“අපි දැන් ගෙදර යමු. ඔයා මේ ගැන කමල්ට දැන ගන්න තියන්න එපා. ඊ ළඟ දවසේ මම වැඩේ අතටම අල්ලලා දෙන්නම්.”
මානෙල්ගේ බලාපොරොත්තුව ඉටු කිරීම සුනිල් වෙනත් දිනයකට කල් දැමුවේය. කාලය ගෙවී ගියේය.
මානෙල් වෙනදා මෙන් සුපුරුදු පරිදි නිවෙසේ වැඩ කටයුතු කළාය. කමල් පිළිබඳ කළකිරුණු සිතක් තිබුණු ඇය ඒ ගැන කමල්ට දැන ගැනීමට ඉඩ නොතැබුවාය.
සුනිල් තම සැළසුමේ දෙවැනි පියවර පටන් ගත්තේ මින් පසුවය.
ඔහු මානෙල්ට යළි දුරකථනයෙන් ඇමතුමක් ගත්තේය.
“මානෙල් මට ඔයා හම්බ වෙන්න ඕන”
“ඇයි? සුනිල් අයියේ...”
“ඔයා එදා ගිය හෝටලයට මාත් එක්ක යන්න එන්න ඕනේ”
“මට බැහැ. ”
“ඒ මොකද ?”
“ඔයා යන්න අකැමැති නම් එදා හෝටලයේ දී ගත්තු ෆොටෝ ටික මම කමල්ට පෙන්නනවා.”
සුනිල්ගේ කතාවට මානෙල් අන්දුන්කුන්දුන් විය. සුනිල් බොරුවක් ගොතා තමාව හෝටලයට රැගෙන ගොස් ඇති බව ඇයට තේරුම් ගියේ එවිටය.
සුනිල් මෙබඳු අයකු යැයි ඇය දැන ගත්තේ එදාය. තම මිතුරියගේ සැමියා වූවද අවශ්ය දේ කර ගැනීමට ඔහු මාන බලන බව මානෙල්ට තේරුම් ගියාය.
නමුත් සුනිල් කියන දෙය කරන්නට ඇයට සිත් දුන්නේ නැත. ඇය මේ පිළිබඳ බොහෝ දුර කල්පනා කරන්නට වූවාය.
දින තුනකට පසුව සුනිල් නැවතත් මානෙල්ට දුරකථන ඇමතුමක් දුන්නේය.
“මට බැහැ. මම එන්නේ නැහැ. මම කාමරයට වෙලා වාඩිවෙලා හිටියා විතරයිනේ. ඒ නිසා ඔයාට ඕන දෙයක් කරන්න. මම බය නැහැ.”
දුරකථන ඇමතුමට පිළිතුරු දෙමින් මානෙල් කියන්නට වූවාය.
“ආ... එහෙමද තමුන්ගේ ගෑනි පිරිමියෙක් එක්ක හෝටලයක කාමරයක හිටියා කියලා කිව්වහම එතැනින් එහාට වෙන දේ දන්නවානේ. මම ඒ වැඩේ කරන්නම්. හරි හරි මම කමල්ට ෆොටෝ ටික පෙන්නන්නම්”
සුනිල්ගේ කතාවෙන් මානෙල් අසරණ වූවාය. ඇය දෙළොවක් අතර තනි වූවාය.
සුනිල් සමඟ කාමරයක තනියෙන් සිටි බව කමල් දැනගතහොත් පවුල් ජීවිතය පවා අවුල් වේ යැයි සිතූ මානෙල් අවසානයේ දී සුනිල්ගේ ඉල්ලීම ඉටු කිරීමට එකඟ වූවාය.
ඇය දින කිහිපයක්ම සුනිල් සමඟ ඒ හෝටලයට ගියාය.
පසුව සුනිල් ඇයගෙන් මුදල් ද ඉල්ලා බලපෑම් කළේය. මානෙල් තමන් දන්නා හඳුනන මිතුරියකගෙන් ලක්ෂ තුනකට අධික මුදලක් සුනිල්ට අරගෙන දුන්නාය.
සුනිල් ගේ බලපෑම් එන්න එන්නම වැඩි වෙද්දී කර කියා ගත දෙයක් නොවූ මානෙල් අවසානයේ දී තම සැමියාගේ පිහිට පැතුවාය.
මානෙල් කියූ සියල්ල අසා සිටි ඇගේ සැමියා ඉවසීමෙන් කටයුතු කළේය. දෙදෙනාම බේරුවල පොලිසියට පැමිණ සිද්ධිය පිළිබඳ පැමිණිලි කළහ.
බේරුවල පොලිස් ස්ථානාධිපති දුමින්ද රාජපක්ෂ මහතා ඔවුන්ගේ පැමිණිල්ල සාවධානව අසා වැඩිදුර පරීක්ෂණ කටයුතු අපරාධ අංශයේ ස්ථානාධිපති ගුණතිලක මහතාට පැවරුවේය.
පොලිස් නිලධාරීන් සුනිල්ව අත්අඩංගුවට ගෙන ප්රශ්න කළේ ඉන් අනතුරුවය. මානෙල් තම කැමැත්තෙන්ම තමුන් සමඟ පැමිණි බව ඔහු පොලිසියට පැවැසුවේය.
මානෙල් සුනිල්ට මුදල් අරගෙන දුන්නේ යැයි කියනු ලබන කාන්තාවකගෙන්ද පොලිසියට කට උත්තරයක් ලබා ගත්තේය.
මානෙල් වරින්වර රුපියල් ලක්ෂ තුනකට වැඩි මුදලක් තමුන්ගෙන් ණයට ඉල්ලා ගත් බවත් ඒවා සුනිල් නමැති අයකුට දුන් බව තමා දන්නා බවත් ඇය පොලිසියේදී කියා සිටියාය.
ව්යාජ අන්දමින් ලබාගත් ඡායාරූප පෙන්වා බිය ගන්වා ස්ත්රී දූෂණය සිදුකර රුපියල් ලක්ෂ තුනකට අධික මුදලක් වරින් වර ලබාගෙන එය නොදී පැහැර හැරීම යන චෝදනා යටතේ උසාවියට ඉදිරිපත් කළ සුනිල් මේ වනවිට සිටින්නේ බන්ධනාගාරගතව ය.
